ລົງກວດກາເກັບກຳຂໍ້ມູນການນຳໃຊ້ວິທະຍຸສື່ສານ (ໂພນີ) 3 ເມືອງ

  ໃນຕອນເຊົ້າຂອງວັນທີ 29-31​ ກໍລະກົດ 2019 ໂດຍພາຍໃຕ້ການນຳພາຂອງທ່ານ ຄຳສິງ ພອນລາວັນ ຮອງຫົວໜ້າພະແນກ ປທສ ແຂວງ ພ້ອມດ້ວຍຮອງຂະແໜງດັດສົມໂທລະຄົມ ແລະ ວິຊາການທີ່ກ່ຽວຂ້ອງ ໄດ້ສົມທົບກັບຫ້ອງການ ປທສ ເມືອງ ໃນ  3 ເມືອງ ຄື: ເມືອງ ວິລະບຸລີ, ເຊໂປນ ແລະ ເມືອງ ພີນ ເພື່ອກວດກາເກັບກໍາຂໍ້ມູນການນໍາໃຊ້ວິທະຍຸສື່ສານ(ໂຟນີ) ແລະ ການແຈ້ງຫຼຸດການນໍາໃຊ້ ເຊິ່ງມີລາຍລະອຽດຄື:

     1. ເມືອງວິລະບຸລີ (ບໍ່ທອງເຊໂປນ)

      ໃນປີ 2019 ບໍ່ທອງເຊໂປນໄດ້ແຈ້ງຫຼຸດການນໍາໃຊ້ເຄື່ອງວິທະຍຸສື່ສານ (ໂຟນີ) ມີຈໍານວນ 166 ເຄື່ອງ ເຊິ່ງເປັນລຸ້ນມືຖືທັງໝົດ, ມີກຳລັງສົ່ງ 5 W, ນຳໃຊ້ຄື້ນຄວາມຖີ່ 136-174 MHz

       ສຳລັບການແຈ້ງຕໍ່ໃບອະນຸຍາດ ແລະ ເສຍພັນທະຕ່າງໆ ໃນການນຳໃຊ້ຕົວຈິງ ທີ່ບໍລິສັດໄດ້ດຳເນີນການສຳລະໃນຕົ້ນປີ 2019 ລວມມີຈໍານວນເຄື່ອງທັງໝົດ 802 ເຄື່ອງ ເປັນລຸ້ນມືຖື 445 ເຄື່ອງ, ຕັ້ງໂຕະ 357 ເຄື່ອງ, ກຳລັງສົ່ງ 5-25 W ແລະ ນຳໃຊ້ຄື້ນຄວາມຖີ່ 136-174 MHz

 2. ເມືອງເຊໂປນ

     ພະແນກ ປທສ ແຂວງສະຫວັນນະເຂດ ໄດ້ຈັດກອງປະຊຸມຮ່ວມກັບຫ້ອງການ ປທສ ເມືອງ ເຊໂປນ ແລະ ໄດ້ເຊີນເອົາຄະນະຫ້ອງວ່າການປົກຄອງເມືອງ ແລະ ກອງບັນຊາການ ປກສ ເມືອງ (ໜ່ວຍງານສື່ສານ) ເພື່ອແນະນໍາປຶກສາຫາລື ກ່ຽວກັບການຊຸກຍູ້ການໃຊ້ວິທະຍຸສື່ສານ (ໂຟນີ) ທີ່ຢູ່ຂົງເຂດບໍລິສັດ ຊັນເປເປີ້

ເພື່ອເປັນການກະຕຸກຊຸກຍູ້ໃຫ້ຫ້ອງການ ປທສ ເມືອງມີຄວາມເຂັ້ມແຂງ ທັງເປັນການຊອກແຫຼ່ງລາຍຮັບຕື່ມອີກ ຄະນະພະແນກ ປທສ ແຂວງ ຈຶ່ງມອບໃຫ້ຫ້ອງການ ປທສ ເມືອງ ເປັນຜູ້ສືບຕໍ່ຈັດຕັ້ງປະຕິບັດ ຕິດຕາມກວດກາ ແລະ ຊຸກຍູ້ ບໍ່ສະເພາະແຕ່ໃນຂົງເຂດບໍລິສັດຊັນເປເປີ້ ເທົ່ານັ້ນ ສໍາລັບຫົວໜ່ວຍທຸລະກິດ ແລະ ພາກສ່ວນອື່ນໆ ກໍ່ໃຫ້ຊຸກຍູ້ໃຫ້ມີການນໍາໃຊ້ຢ່າງຖືກຕ້ອງຕາມລະບຽບກົດໝາຍ ແລະ ຕໍ່ການຊີ້ນໍາດັ່ງກ່າວຫ້ອງການ ປທສ ເມືອງ ກໍ່ໄດ້ຕົກລົງກັບພາກສ່ວນທີ່ເຂົ້າຮ່ວມເພື່ອນໍາສະເໜີທ່ານເຈົ້າເມືອງອອກຂໍ້ຕົກລົງແຕ່ງຕັ້ງຄະນະກວດກາສະເພາະກິດຂອງເມືອງ ເພື່ອດໍາເນີນການລົງຊຸກຍູ້ ແລະ ພາຍຫຼັງມີຄວາມຄືບໜ້າແລ້ວຈະລາຍງານມາຍັງພະແນກ ປທສ ແຂວງ

 3. ເມືອງພີນ

          ໂດຍອີງຕາມການລາຍງານ ຂອງຫ້ອງການ ປທສ ເມືອງ ວ່າບໍລິສັດຮັບປະທາານສຳເລັດການກໍ່ສ້າງ ແລະ ຍົກຍ້າຍອອກຈາກເຂື່ອນ ເຊິ່ງນໍາເອົາເຄື່ອງວິທະຍຸສື່ສານ (ໂຟນີ) ຈໍານວນ 13 ເຄື່ອງໄປພ້ອມ ຕໍ່ບັນຫານີ້ ຄະນະຈາກພະແນກ ປທສ ແຂວງ ກໍ່ໄດ້ຈັດກອງປະຊຸມຮ່ວມກັບຫ້ອງວ່າການປົກຄອງເມືອງ ໂດຍການເຂົ້າຮ່ວມເປັນປະທານ ຂອງທ່ານ ຄໍາຮູ້ ສຸລິສິດ ກໍາມະການພັກເມືອງ ຫົວໜ້າຫ້ອງວ່າການປົກຄອງເມືອງ, ມີຜູ້ເຂົ້າຮ່ວມຈາກຫ້ອງການ ປທສ ເມືອງ, ພະນັກງານຂອງພະແນກ ປທສ ແຂວງ ທີ່ລົງເຄື່ອນໄຫວຢູ່ຮາກຖານ ແລະ ພາກສ່ວນທີ່ກ່ຽວຂ້ອງ ເພື່ອແນະນໍາ ແລະ ເນັ້ນໜັກໃຫ້ຫ້ອງການ ປທສ ເມືອງ ເອົາໃຈໃສ່ໃນການສືບຕໍ່ຕິດຕາມເກັບກໍາຂໍ້ມູນ ຈາກພາກສ່ວນດັ່ງກ່າວຄືນ ແລະ ມອບໃຫ້ເກັບກໍາຂໍ້ມູນການນໍາໃຊ້ຈາກບັນດາພາກສ່ວນຕ່າງໆ ເພື່ອຊຸກຍູ້ໃນການເສຍຄ່ານໍາໃຊ້ ແລະ ຖືໃບອະນຸຍາດຕາມລະບຽບກົດໝາຍ.

ຕອບກັບ

ເມວຂອງທ່ານຈະບໍ່ຖືກເຜີຍແຜ່ໃຫ້ໃຜຮູ້ ບ່ອນທີ່ຕ້ອງການແມ່ນຖືກຫມາຍໄວ້ *